Kreu i Shërbimit të Inteligjencës Sekrete MI6 të Britanisë, Richard Moore ka deklaruar se lufta e Rusisë në Ukrainë do të jetë ‘e pafitueshme’ sepse presidenti Vladimir Putin nuk do të arrijë kurrë fitore politike mbi popullin e vendit.
Lidhur me kostot ekonomike, Daily Mail shkruan se lufta e Putinit i shkakton Rusisë një dëm prej rrreth 18 miliardë euro në ditë. Ish-shefi i mbrojtjes i Estonisë, Riho Terras, ka pohuar se Rusisë po i mbarojnë me shpejtësi paratë dhe armët dhe do të duhet të hyjë në negociata me qeverinë e Volodymyr Zelenskyt nëse Kievi i bën rezistencë sulmeve për 10 ditë.
Mendohet se Putini ka mbajtur një takim me oligarkët në një bunker në malet Urale, në të cilin pretendohet se ai shprehu me entuziazëm se mendonte se lufta do të ishte ‘e lehtë’ dhe ‘gjithçka do të bëhej brenda 1-4 ditësh’. Duke cituar burime të inteligjencës ukrainase, Terras pohoi se lufta po i kushton Rusisë rreth 15 miliardë paund në ditë, ose rreth 18 miliardë euro dhe se ata kanë raketa për maksimumi tre deri në katër ditë, të cilat i përdorin me kursim.
Ai pretendoi se plani i Putinit është mbështetur në përhapjen e panikut në popull duke gjuajtur ‘rastësisht’ raketa në zonat e banuara për të ‘frikësuar’ ukrainasit, si dhe duke shkaktuar dezertime masive në ushtri.
